សកម្មភាពវិនិយោគដែលបានចុះបញ្ជីជា គ.ល.គ. មានសិទ្ធិជ្រើសរើសកញ្ចប់លើកទឹកចិត្តជាមូលដ្ឋានក្រោម​២ជម្រើសដូចខាងក្រោម៖

១- ជម្រើសទី១ នឹងទទួលបានការលើកទឹកចិត្តដូចខាងក្រោម៖

ក-ការលើកលែងពន្ធលើប្រាក់ចំណូលចាប់ផ្តើមពីពេលទទួលបានប្រាក់ចំណូលដំបូងពីសកម្មភាពអាជីវកម្មក្នុងរយៈពេលជាក់លាក់មួយ អាស្រ័យតាមប្រភេទសកម្មភាពវិនិយោគដែលមានចែងក្នុងបញ្ជីសកម្មភាពវិនិយោគនៃឧបសម្ព័ន្ធ២ នៃអនុក្រឹត្យដូចខាងក្រោម៖

• ៩ (ប្រាំបួន) ឆ្នាំសម្រាប់ក្រុមទី១

• ៦ (ប្រាំមួយ) ឆ្នាំសម្រាប់ក្រុមទី២

• ៣ (បី) ឆ្នាំសម្រាប់ក្រុមទី៣

ខ-សិទ្ធិទទួលបានការលើកទឹកចិត្តក្នុងការបង់ពន្ធលើប្រាក់ចំណូល តាមអត្រាកំណើនតាមពេលធៀបទៅនឹងប្រាក់ពន្ធត្រូវបង់សរុប បន្ទាប់ពីផុតរយៈពេលលើកលែងពន្ធលើប្រាក់ចំណូល៖

• ២៥ (ម្ភៃប្រាំ) ភាគរយសម្រាប់២ (ពីរ) ឆ្នាំដំបូង

• ៥០ (ហាសិប) ភាគរយសម្រាប់២ (ពីរ) ឆ្នាំបន្ទាប់ និង

• ៧៥ (ចិតសិបប្រាំ) ភាគរយសម្រាប់២ (ពីរ) ឆ្នាំចុងក្រោយ

គ-ការលើកលែងប្រាក់រំដោះបុរេប្រទានពន្ធលើប្រាក់ចំណូលក្នុងរយៈពេលជាក់លាក់មួយអាស្រ័យតាមប្រភេទសកម្មភាពវិនិយោគដែលមានចែងក្នុងបញ្ជីសកម្មភាពវិនិយោគនៃឧបសម្ព័ន្ធ២ នៃអនុក្រឹត្យដូចខាងក្រោម៖

• ៩ (ប្រាំបួន) ឆ្នាំសម្រាប់ក្រុមទី១

• ៦ (ប្រាំមួយ) ឆ្នាំសម្រាប់ក្រុមទី២

• ៣ (បី) ឆ្នាំសម្រាប់ក្រុមទី៣

ឃ-ការលើកលែងពន្ធអករអប្បបរមាដោយត្រូវមានរបាយការណ៍សវនកម្មឯករាជ្យ។

ង- ការលើកលែងអាករនាំចេញលើកលែងតែមានចែងដោយឡែកក្នុងច្បាប់និងបទប្បញ្ញត្តិផ្សេងទៀត។

២- ជម្រើសទី២ នឹងទទួលបានការលើកទឹកចិត្តដូចខាងក្រោម៖

ក-សិទ្ធិកាត់កងចំណាយមូលធនតាមរយៈការរំលស់ពិសេសដូចមានចែងក្នុងបទប្បញ្ញត្តិស្តីពីពន្ធដារជាធរមាន។

ខ- សិទ្ធិកាត់កងរហូតដល់ ២០០ (ពីររយ) ភាគរយនៃចំណាយជាក់លាក់ផ្សេងទៀតក្នុងរយៈពេលជាក់លាក់ អាស្រ័យតាមប្រភេទសកម្មភាពវិនិយោគដែលមានចែងក្នុងបញ្ជីសកម្មភាពវិនិយោគនៃឧបសម្ព័ន្ធ២ នៃអនុក្រឹត្យដូចខាងក្រោម៖

• ៩ (ប្រាំបួន) ឆ្នាំសម្រាប់ក្រុមទី១

• ៦ (ប្រាំមួយ) ឆ្នាំសម្រាប់ក្រុមទី២

• ៣ (បី) ឆ្នាំសម្រាប់ក្រុមទី៣

– ចំណាយជាក់លាក់មួយចំនួនរួមមាន៖

• ចំណាយលើការបណ្តុះបណ្តាលជំនាញជាក់លាក់ដល់និយោជិតខ្មែរដើម្បីជំនួសនិយោជិតបរទេស

• ចំណាយលើការប្រើប្រាស់បញ្ចីគណនេយ្យតាមប្រព័ន្ធបច្ចេកវិទ្យាព័ត៌មាន

• ចំណាយលើការផ្តល់អាហារូបករណ៍ជូននិយោជិតខ្មែរទៅសិក្សាជំនាញជាក់លាក់ណាមួយនៅបរទេស

• ចំណាយលើការសិក្សា ស្រាវជ្រាវនិងអភិវឌ្ឍន៍ និងការជួលអ្នកជំនាញបរទេសមកបណ្តុះបណ្តាលលើបច្ចេកវិទ្យាថ្មីៗបដិវត្តន៍ឧស្សាហកម្មទី៤ មានជាអាទី៍ បញ្ញាសិប្បនិម្មិត និងបច្ចេកវិទ្យារ៉ូបូត ឬការរៀបចំដំឡើងស្តុកទុកទិន្នន័យធំ។

គ-ការលើកលែងការប្រាក់បុរេប្រទានពន្ធលើប្រាក់ចំណូលសម្រាប់រយៈពេលជាក់លាក់មួយអាស្រ័យតាមប្រភេទសកម្មភាពវិនិយោគដែលមានចែងក្នុងបញ្ជីសកម្មភាពវិនិយោគនៃឧបសម្ព័ន្ធ២ នៃអនុក្រឹត្យដូចខាងក្រោម៖

• ៩ (ប្រាំបួន) ឆ្នាំសម្រាប់ក្រុមទី១

• ៦ (ប្រាំមួយ) ឆ្នាំសម្រាប់ក្រុមទី២

• ៣ (បី) ឆ្នាំសម្រាប់ក្រុមទី៣

ឃ-ការលើកលែងពន្ធអប្បបរមាដោយត្រូវមានរបាយការណ៍សវនកម្មឯករាជ្យ។

ង-ការលើកលែងពន្ធនាំចេញលើកលែងតែមានចែងផ្សេងពីនេះក្នុងច្បាប់និងបទប្បញ្ញត្តិផ្សេងទៀត។

បន្ថែមលើការលើកទឹកចិត្តនៃជម្រើសទាំង២ (ពីរ) ខាងលើ៖

ក. គ.ល.គ. មានសិទ្ធិនាំចូលដោយពន្ធគយ អាករពិសេស និងអាករលើតម្លៃបន្ថែម ជាបន្ទុករបស់រដ្ឋនូវសម្ភារៈសាងសង់ បរិក្ខារសំណង់ និងសម្ភារៈបរិក្ខារផលិតកម្មសម្រាប់បម្រើខ្សែច្រវាក់ផលិតកម្មរបស់ខ្លួន។

ខ. បន្ថែមលើចំណុច (ក) នៃកថាខណ្ឌនេះ គ.ល.គ. បម្រើឲ្យការនាំចេញ ឬ គ.ល.គ. ដែលជាប្រភេទឧស្សាហកម្មគាំទ្រដល់ គ.ល.គ. បម្រើឲ្យការនាំចេញ មានសិទ្ធិនាំចូលដោយពន្ធគយ អាករពិសេស និងអាករលើបន្ថែម ជាបន្ទុករបស់រដ្ឋ នូវធាតុចូលផលិតកម្មសម្រាប់វម្រើខ្សែច្រវាក់ផលិតកម្មរបស់ខ្លួន។ ក្នុងករណីធាតុចូលផលិតកម្ម ពុំបានប្រើប្រាស់សម្រាប់ផ្គត់ផ្គង់ឲ្យខ្សែច្រវាក់ផលិកម្ម គ.ល.គ. បម្រើឲ្យការនាំចេញ ឬ គ.ល.គ. ដែលជាប្រភេទឧស្សាហកម្មគាំទ្រដល់ គ.ល.គ. បម្រើឲ្យការនាំចេញត្រូវបង់គយ អាករពិសេស និងអាករលើតម្លៃបន្ថែមតាមច្បាប់និងលិខិតបទដ្ឋានគតិយុត្តជាធរមាន។

គ. លើកលែងតែមានកំណត់ផ្សេងដោយច្បាប់ សកម្មភាពវិនិយោគទាំងឡាយណាស្ថិតនៅក្នុងឧបសម្ព័ន្ធទី៣នៃអនុក្រឹត្យនេះ ត្រូវបានការលើកទឹកចិត្តលើការនាំចូល ដោយអាករពន្ធគយ អាករពិសេស និងអាករលើតម្លៃបន្ថែមជាបន្ទុករបស់រដ្ឋនូវសម្ភារៈសាង់សង់ បរិក្ខារសំណង់ និងសម្ភារៈបរិក្ខារផលិតកម្មសម្រាប់បម្រើខ្សែច្រវាក់ផលិតកម្មរបស់ខ្លួន តែមិនទទួលបានការលើកទឹកចិត្តផ្នែកពន្ធដារ ក្រោយពីទទួលបានវិញ្ញាបនបត្រចុះបញ្ជីបញ្ជាក់ឋានៈជា គ.ល.គ. ដូចមានចែងក្នុងច្បាប់ស្តីពីវិនិយោគនៃព្រះរាជាណាចក្រកម្ពុជា។

ឃ. គ.ល.គ. បម្រើទីផ្សារក្នុងស្រុក ដែលមានសម្មភាពវិនិយោគស្ថិតក្នុងឧបសម្ព័ន្ធ (ឃ) នៃអនុក្រឹត្យនេះមានសិទ្ធិនាំចូល ដោយពន្ធគយ អាករពិសេស និងអាករលើតម្លៃបន្ថែម ជាបន្ទុករបស់រដ្ឋ នូវធាតុចូលផលិតកម្មសម្រាប់បម្រើខ្សែច្រវាក់ផលិតកម្មរបស់ខ្លួន។

ង. ចំពោះ គ.ល.គ. បម្រើទីផ្សារក្នុងស្រុក ដែលមានលទ្ធភាពនាំចេញដោយផ្ទាល់ ឬផ្គត់ផ្គង់ជាធាតុចូលផលិតកម្មដល់ គ.ល.គ. បម្រើឲ្យនាំចេញនូវផ្នែកណាមួយនៃផលិតផលដែលបានផលិតពីធាតុចូលផលិតកម្មដែលបាននាំចូលនិង និងបំពេញកាតព្វកិច្ចពន្ធអាកររួចហើយ ត្រវទទួលបានការបង្វិលសង ឬទុកសម្រាប់ការទូទាត់នូវ ពន្ធគយ អាករពិសេស និងអាករលើរម្លៃបន្ថែម ចំពោះទំនិញដែលត្រូវបាននាំចូលនៅពេលបន្ទាប់ ដោយអនុលោមតាមច្បាប់ លិខិតបទដ្ឋានគតិយុទ្ធ និងនីតិវិធីជាធរមាន តាមការស្នើសុំរបស់វិនិយោគិន។